ltl_nr_11-2000_bemaerk

Imigassanik aalakoornartortalinnik nioqquteqartarneq sassaallertarnerlu pillugit Inatsisartut inatsisissaattut nr. xx, uu. qqqq 2000-imeersussamut siunnersuut

Inatsisartut 2000-imi ukiukkut ataatsimiinnerannut atatillugu imigassanik aalakoornartulinnik nioqquteqarneq sassaallertarnerlu pillugit Inatsisartut inatsisaata allannguutissaatut siunnersuummik saqqummiussinissartik Naalakkersuisut neriorsuutigisimavaat.

Imigassanik kimikitsunik aamma kimittuunik nioqquteqarnermut sassaallernermullu akuersissummik peqarnissap massakkut piumasaqaataalernissaa Naalakkersuisut kissaatigisimavaat. Tamanna ilaatigut immiaaqqanik 3,6-inik nioqquteqarnermik il.il. killilersuinermik nassataqartussaavoq.

Naalakkersuisut isumaqarsimapput imigassat kimikitsut imigassatut kimittuutulli sapinngisamik aalalajangersaavigineqartariaqartut. Matumani inatsimmi aalajangersakkanik annertuumik sumiginnaasoqarnerani - aamma imigassat kimikitsut eqqarsaatigalugit - nioqquteqartut sutorniartarfiutillilluunniit nioqquteqarnissamut sassaallernissamulluunniit akuersissummik pigisaannik arsaarneqarallarsinnaanerat ataavartumilluunniit arsaarneqarsinnaanerat ilanngullugu eqqarsaatigalugu.

Naalakkersuisut nutaatut kissaatigisimavaat, tamanna tulluartuusorineqassappat, imigassanik kimikitsuinnarnik nioqquteqarnissamut sassaallernissamulluunniit akuersissummik tunniussisinnaanerup periarfissiissutigineqarnissaa.

Imigassanik nioqquteqarsinnaanermut/sassaallersinnaanermut akuersissutini akuersissutip atuuffissaa oqaatigineqassaaq. Nakkutilliineq pitsaanerulersinniarlugu akuersissutit suussusii aalajangersimalluinnartut atulersinneqassapput. Taamaattorli imigassanik nioqquteqarsinnaa-nernermut/sassaallersinnaanermut akuersissutini atuutereersut atorunnaarsinneqarnissamik imaluunniit ataavartumik arsaarinnissutigineqarnissamik tungaanut atuutissapput, inatsisillu akuerineqarnera aallarnerfigalugu imigassanik kimittuunik kimikitsunillu nioqquteqarnermut sassaallernermullu akuersissutitut atuutilissallutik.

Imigassat kimittuut kimikitsullu immikkoortisimaneqarnerat atorunnaarsinneqanngilaq, tassami kioskit, iffiorfiit, videonik nioqquteqarfiit/atorniartarfiit il.il. ullumikkut inatsisinik unioqqutitsinatik imigassanik aalakoornartortalinnik kimikitsunikk nioqquteqarsinnaareersut imigassanik aalakoornartortalinnik kimikitsunik nioqquteqarnikkut kaaviiaartitsisinnaanissaat kommunimiit akuerineqarsinnaanissaa siunertarineqarmat. Niuertarfiit taakku imigassanik aalakoornartortalinnik kimittuunik nioqquteqarsinnaanermut akuerineqarnissamut piumasaqaatit atuuttut assi-nginik, matumani init akuerineqarnissaannut, imigassanik kimittuunik nioqquteqarsinaanermut akuerineqarnissami torersaarnissamut piumasaqaatinik, ilanngullugit ukiukitsunut aalakoortunulluunniit nioqquteqarnissap inerteqqutaaneranik siunissami aamma piumasaqaateqarfiulissammata.

Piffissat nioqquteqarnerup sassaallernerulluunniit pisarfiisa killilersuiffigineqarnissaat kiisalu niuertarfiit suliffeqarfinnut imigassanik aalakoornartortalinnik ullumikkut tuniniaasartunut piumasaqaatit, killilersuinerit nakkutilliinerillu assinginik ingerlatsivigineqarnissaat siunertaasimavoq.

Imigassanik kimikitsunik nioqquteqarsinnaanermut akuersissutip atulersinneqarneratigut erseqqinnerusumik takuneqarsinnaalissaaq suliffeqarfik imigassanik nioqquteqarsinnaanermut akuersissummik - tamanit takuneqarsinnaasunngorlugu nivinngarneqarsimasussamik - peqarnersoq peqannginnersorluunniit. Imigassanik nioqquteqarsinnaanermut akuersissut imigassanik nioqquteqarsinnaanermut akuersissutitut massakkut atuuttutut piffissami aalajangersimasumik sivisussusilimmi ataavartumilluunniit kommunalbestyrelsimit arsaarinnissutigineqarsinnaavoq. Kiisalu imigassanik kimikitsunik nioqquteqartut piumasaqaatit imigassanik nioqquteqarsinnaanermut/sassaallersinnaanermut akuersissummik tunineqassagaanni piumasaqaataasut massakkut nammineq eqqortissimasalissavaat.

Inatsimmi massakkut atuuttumi Imigassaq pillugu Inatsisartut Ataatsimiititaliaat pillugu aalajangersakkanik ilanngussisoqarsimavoq. Inatsisartut Naalakkersuisullu pillugit Inatsisartut inatsisaat naapertorlugu Inatsisartut ataavartunik pigallartumillu ataatsimiititalianik pilersitsisinnaapput. Inatsisartut Naalakkersuisullu pillugit Inatsisartut inatsisaata avataatigut inatsisiliatigut allatigut Inatsisartut ataatsimiititaliaat maleruagassiuunneqartariaqanngimmata Imigassaq pillugu Inatsisartut Ataatsimiititaliaat inatsisissatut siunnersuummi peerneqarpoq.

Naalakkersuisut Imigassaq Ikiaroornartullu pillugit Siunnersuisoqatigiinnik ilaatigut imigassanut tunngasuni apeqqutini siunnersortissaminnik pilersitsereersimammata inatsisip allanngortinneqarneranut atatillugu taassuma inatsimmi ilanngunneqarnissaa pissusissamisoortinneqarsimavoq. Tamatuma kingunerisaanik Imigassaq Ikiaroornartullu pillugit Siunnersuisoqatigiit inatsisikkut aalajangersagaasumik ataatsimiititalianngorput. Inatsisartut 2000-imi ukiukkut ataatsimiinneranni Imigassaq Ikiaroornartullu pillugit Siunnersuisoqatigiit imigassaq pillugu inatsisissatut nutaassatut siunnersuummi ilanngunneqarnissaa Naalakkersuisut neriorssuutigaat. Taamaalilluni tamanna pivoq.

Aammattaaq siunnersuut pisortat suliffeqarfiisa aamma namminersortut niuertarfiisa, akunnittarfiit, sutorniartarfiit umiarsuillu naligiisinneqarnerannik imaqarpoq, tassami pisortat suliffeqarfiisa imigassanik nioqquteqarsinnaanermut/sassaallersinnaanermut akuersissummik manna tikillugu peqartariaqarsimannginnerat atorunnaarsinneqarmat. Tamanna ingerlatseqatigiiffiit pisortanit pigineqartut taamaattunik ingerlataqartut amerlanersaasa niuernermi atugassarititaasunik atugassaqartitaallutik ingerlanissaminnik kissaateqarnerat innersuussutigalugu pivoq. Tamanna tunngavigalugu pisortat suliffeqarfiisa imigassanik nioqquteqarsinnaanermut/sassaaller-sinnaanermut akuersissummik peqartinneqannginnissaat tunngavissaqarsorinngilaat, kommunillu nalinginnaasumik nakkutilliineranni nakkutigisassanut ilaatinneqartariaqarsoralugit. Pisortat suliffeqarfiutaat eqqarsaatigalugit inuussutissarsiornermut allagartanik akuersissutinik peqarnissaq pillugu malittarisassat immikkut ittut inuussutissarsiorneq allallu pillugit inatsisiniittut suli atuupput.

Sutorniartarfimmi sassaallertarfinnilu matunerup kingorna minutsini 30-ni isersimasinnaaneq nal. akunneranut ataatsimut sivitsorneqassasoq siunnersuutigineqarpoq. Tamanna assigiinngitsut pissutigalugit pivoq, tassami sutorniartarfinni sassallertarfinnilu angisuuni minutsit 30-t taakku eqqortinniarnerat assut ajornartorsiutaasartoq paasinarsisimammat. Init toqqissisimanerusumik inuerukkiartuaartinneqartarnerat sutorniartarfiit sassaallertarfiillu matunerinut atatillugu torersuutitsiniarnermi ikinnerusunik ajornartoriutissaqalersitsissasoq neriuutigineqarpoq. Taamaaliorneq "anngiortumik nioqquteqarnerup" ammaanneqarnissaanik siunertaqanngilaq. Akuersissummik piginnittoq matorrernerup nalaani sassaallertoq qaninngarneqaruni/paasineqa-runi akuersissummik qaammammi ataatsimi arsaarneqarsinnaavoq, taamaalioqqippallu ataavartumik arsaarneqarsinnaalluni.

Inatsimmik unioqqutitsilluni aalakoornartortalinnik angerlarsimaffinni imigassaliat aalakoornartortalinnillu angerlarsimaffimmi imigassaliornissamut nalinginnaasumik atortussat Landskarsimut iluanaarutissanngorlugit arsaarinnissutigineqartalernissaannut inatsisitigut tunngavissaat atulersinneqarput.

Imigassanik aalakoornartortalinnik nioqquteqarsinnaanermut/sassaallersinnanermut akuersissummik ataasiaannartumillu akuersissummik pissarsinissamut akiliutissanik Naalakkersuisut akiliisitsisalernissaannut inatsisitigut tunngavissat atulersinneqarput.

Kiisalu qallunaatuuani taaguutit pisoqalisut "udhandling" aamma "servering" ullutsinnut naleqqunnerusumik "salg"imik aamma "udskænkning"imik taarserneqarsimapput, kalaallisuuanut allannguutaanngitsumik. Inatsisip qallunaatut oqaasertalersugaanerani iluarsiinerinnaapput.

Siunnersuutigineqarpoq inatsit 1. januar 2001 aallarnerfigalugu atortuulersinneqassasoq. Ullup taassuma atortuulersitsivinngorneratigut suliassaqarfimmi tassani nalunaarutit atuuttut pisaria- qartumik allanngortinneqarnissaannut kiisalu imigassanik nioqquteqarsinnaanermut/sassaal- lersinnaanermut akuersissutinik qinnuteqarnermi immersugassanik akuersissutinillu nutaanik sananissamut periarfissaqalissaaq. Pissutissaqavilluni § 12, imm. 1-ip aamma imigassat kimikitsut eqqarsaatigalugit nioqquteqarsinnaanermut/sassaallersinnaanermut akuersissutit pillugit § 3-mi piumasaqaatip aatsaat ulloq 1. august 2001-imiit atortuulersinneqarnissaat siunnersuutigineqarpoq.

Inatsit Kalaallit Nunaanni kommuninut, KANUKOKA-mut, Kangerlussuarmi nunaqqatigiit siunnersuisoqatigiivinut, Kalaallit Nunaanni Rigsombudsmandimut, Politimesterimut, Grønlands Arbejdsgiverforeningimut, Arbejdsgiverorganisationen vedrørende Handel, Service og Transporterhvervene i Grønlandimut, PAARISA-mut, Isumaginninnermut Suliffeqarnermullu Pisortaqarfimmut, Peqqinnissamut Avatangiisinullu Pisortaqarfimmut, Akileraartarnermut Pisortaqarfimmut, Aningaasaqarnermut Pisortaqarfimmut, Nuuk Imeq A/S-imut, Imigassaq Ikiaroornartorlu pillugit Siunnersuisoqatigiinnut, brancheudvalgsrepræsentant Helge Tang-imut, Hotel Godthåb A/S, brancheudvalgsrepræsentant Magnus Agerskov-imut, Hotel Hans Egede A/S, brancheudvalgsrepræsentant Arne Amstrup-imut, Nota Bene A/S, advokat Nicholas Symes-imut aamma KNI Pilersuisoq A/S-imut tusarniaatigineqarsimavoq.

Inatsisip aqutsinikkut aningaasaqarnikkullu annertuunik suliassaqarnerulerneq aningaasartuuteqarnerulernerlu kingunerissagai naatsorsuutigineqanngilaq.

Aalajangersakkani, allannguutit allannguutigalugit siusinnerusukkut inatsisip § 1-ianut 2-anullu naapertuuttut, inatsimmi taaguutit pingaaruteqartut: "imigassat aalakoornartortallit", "imigassat kimittuut" aamma "imigassat kimikitsut" suussuserneqarput. Imigassat kimikitsut kimittuullu akornanni killiliussap imigassaq pillugu inatsimmi atuuttumi imigassat kimittuut kimittussutsimikkut ammut killingat malippaa.

Aalajangersagaq siusinnerusukkut inatsisip § 3-anut naapertuuppoq. Aalajangersakkami erseqqissumik oqaatigineqarpoq imigassanik aalakoornartortalinnik kimittuunik kimikitsunillu nioq-quteqarsinnaanissamut sassaallersinnaanissamulluunniit akuersissummik pigisaqarnissaq piumasaqaataasoq aammalu imigassanik aalakoornartortalinnik nioqquteqarsinnaanissamut sassaallersinnaanissamullu akuersissummik pissarsisinnaassagaanni inuussutissarsiummut allagartat pillugit inatsit atuuttoq malillugu inuussutissarsiummut allagartaqarnissaq tamatigut piumasaqaataasoq.

Nutaatut pisortat suliffiutaasa niuertarfiit, akunnittarfiit, sutorniartarfiit umiarsuillu imigassanik aalakoornartortalinnik nioqquteqarsinnaanermut/sassaallersinnaanermut akuersissummik aamma inuussutissarsiummut allagartamik pigisaqarnissamik piumasaqarfiusunut ilaannginnerat aatsaat atortinneqassaaq tamanna inatsisiliani allani aalajangersarneqarsimappat. Tamatumuuna siunertaapput namminersortut pisortallu suliffeqarfiutaasa niuertarfiit, akunnittarfiit, sutorniartarfiit umiarsuillu naligiimmik pineqalernissaat aammalu taakku imigassanik aalakoornartortalinnik nioqquteqarsinnaatitaalissanersut sassaallersinnaatitaalissanersulluunniit kommunalbestyrelsimit aalajangiiffigineqartalernissaa, nakkutigineqalernissaa aammalu nioqquteqarnermut sassaallernermulluunniit piumasaqaatinik aalajangersaaffigineqartalernissaa.

Aalajangersagaq siusinnerusukkut inatsisip § 5-ianik ingerlatitseqqinneruvoq, taamaattoq inatsisip allanngornerata kingunerisaanik imigassat kimikitsut akuersissutigineqartartussanut ilanngunneqarput.

Imm. 1-imi aalajangersakkakkut oqaatigineqarpoq sumiiffimmi kina tunniussisussaatitaanersoq.

Imm. 2-mi aalajangersakkakkut najukkami nioqquteqarfiit sassaallertarfiillu, taakkulu qanoq ittut sumilu pilersinneqarnissaannut kommunalbestyrelsi aalajangiisuunissaminut periarfissinneqarpoq.

Imernaveersaartitsinissamut, inooqatigiinnermut politeeqarnermullu tunngasut kommunip akuersissuteqartarnikkut ingerlatsinermini mianerissagai tunngavissaatitaavoq.

Aalajangersakkatut siunnersuut tunngavigalugu suliffiit inuit najugaqarfippiaanniittut imaluunniit soorlu timersorfiit, timersortarfiit, atuarfiit/ilinniarfiit allalluunniit inuusuttunit orninneqartartut eqqaanniittut imigassanik aalakoornartortalinnik nioqquteqarsinnaanermut/sassaallersin-naanermut akuersissummik tunineqarnissaat kommunalbestyrelsip itigartitsissutigisinnaavaa.

Kantiinat, cafeteriet, pipallakkanik tamulunniarfiit taamaaqataalluunniit maannamutut imigassanik kimittuunik nioqquteqarfiusariaqanngillat. Taaneqartulli imigassanik kimikitsunik sassaallerfiusinnaanissaat imaluunniit imigassartorfiunatik katersuuffiusinnaanissaat kommunalbe-styrelsip nammineq aalajangiiffigissavaa. Kantinat eqqarsaatigalugit suliffinni imigassartortarnissap inerteqqutigineqarnissaanik 1985-imi inatsisartut inassuteqaataata kingunerisaanik imigassartorfiunngitsuusariaqarput. § 13, imm. 2-mi mittarfiit kioskiisa akunnittarfiillu unnuisuinut sassaalliisoqarsinnaaneranik immikkut aalajangersagaq nutaatut ilanngunneqarpoq. Sassaallerfiusinnaasut maani taaneqartut eqqarsaatigalugit § 13, imm. 2-mut oqaaseqaatit innersuutigineqassapput.

Pisiniarfiit mikisut, matumanittaaq kioskit, imigassanik aalakoornartortalinnik nioqquteqarsinnaanissamut akuersissutinik tunineqartariaqanngillat imigassanik kimittuunik nioqquteqarnikkut kaaviiaartitsineq piginnittumut annertuumik iluanaarutaalissasoq naatsorsuutigisariaqarpat. Oqaatigineqassaarli pissutsit najoqqutaralugit illoqarfinni mikinerusuni nunaqarfinnilu namminersorlutik inuussutissarsiuteqartut pisortat pisiniarfiutaannut unammillersinnaanissaat eqqarsaatigalugu kommunalbestyrelsi piumasaqaatinik qasukkaasinnaatitaasoq.

Aalajangersagaq tunngavigalugu sutorniartarfeqarnerup pitsaanerulersinneqarnissaa anguniarlugu pissutissaatitaasussanik kommunalbestyrelsi peqqussuteqarsinnaavoq, soorlu akuersissuteqarnissamut pissutissaatissinnaallugu nerisassanik sassaalliisoqarsinnaassasoq, taamaaliornikkut imerniartarfippiaannaat peerutsinniarlugit ikilisinniarlugilluunniit.

Pissutissaatitaasut suut piumasaqaatigineqarnissaat, tak. siunnersuutip § 24, imm. 2-a, pillugu aalajangersakkat erseqqinnerusut Naalakkersuisut aalajangersassavaat. Suliassamik ingerlatitseqqiffiusinnaasumik peqanngilaq, kisianni ingerlatsineq pillugu inatsisit nalinginnaasut aqqutiginiarneqarsinnaapput.

Imm. 3-mi aalajangersakkakkut taagorneqarput akuersissutit nalinginnaasut atorneqartut. Nakkutilliineq tunniussisarnerlu pisariinnerulersinniarlugit akuersissut sorleq pineqarnersoq akuersissummi namminermi taaneqassaaq. Akuersissutit suussusiisa aalajangersakkami taaneqartut saniatigut akuersissutit allat, soorlu § 13, imm. 2 malillugu akuersissutit, tak. § 13, imm. 2, aamma ataasiaannartumik akuersissutit, tak. §§ 8, 13 aamma 24, siumugassaapput.

Imm. 4 eqqarsaatigalugu akuersissummi erseqqissumik takuneqarsinnaassaaq ini suna inilluunniit suut imigassanik kimittuunik kimikitsunilluunniit nioqquteqarfittut sassaallerfittulluunniit atorneqarsinnaanersut.

Imm. 5-imi aalajangersarneqarpoq nakkutilliineq pinerullugu piumasaqaataasoq akuersissutip inimi nioqquteqarfimmi sassaallerfimmiluunniit erseqqissumut inissinneqarnissaa. Arlaannik patsiseqartumik akuersissut atuarneqarsinnaajunnaarpat taassuma assinga nutaaq piaartumik pissarsiarineqassaaq nivinngarneqarlunilu.

Imm. 6-imi piffissaq akuersissutip atuuffia ukiut pingasut allannguuteqartinneqanngilaq, tassa kommunalbestyrelsip imigassap tungaatigut ingerlatsinermini allanngortitsinissamik kissaateqarnerminut atatillugu inatsisartut inatsisaanni aalajangersakkanik pilertortumik kommunalbestyrelsip atuisinnaatitaanissaa kissaatigineqarmat. Maleruagassat malinneqarnerisa nakkutigineqarnissaa kommunalbestyrelsit ataasiakkaat pisussaaffigaat, oqaatigineqassaarlu pitsaasumik ingerlatsinissami tunngavissat nalinginnaasut tunngavigalugit aammalu akuersissummik pigisaqartup imigassanik aalakoornartortalinnik nioqquteqarsinnaanermut/sassaallersinnaanermut akuersissummik pissarsisinnaanermut pissutissaatitaasut suli eqquutsippagit eqqoriaanerinnaq tunngavigalugu akuersissutip atorunnaartup nutarterneqarnissaa itigartitsissutigineqarsinnaan-ngitsoq.

Akuersissutit ukiunit pingasunit sivikinnerusumik atuuttussat qaqutiguinnaq tunniunneqarsinnaasariaqarput, assersuutigalugu ukiup ilaaniinnaq atugassat.

Aalajangersagaq periarfissiivoq pigallartumik akuersissutinik tunniussinissamut, assersuutigalugu nutarterinissamik qinnuteqaateqarnermut atatillugu. Taamaattor pigallartumik akuersissutit taamaattut taamaallaat atuutissapput kommunalbestyrelsip tullianik ataatsimiinnissaata tungaanuinnaq aammalu annerusumik atorneqassallutik kommunini akuttusuumik kommunalbestyrelsii ataatsimiittartuni.

Imm. 7-mi aalajangersakkakkut kommunalbestyrelsip ataatsimiittarnerisa akuttusuujuneri taamaattumillu akuersissumik qinnuteqaatip aalajangiiffigineqarnissaata utaqqingaatsiarneqarsinnaanera maleruagassiuunneqarpoq. Aalajangersagaq mianersortumik atorneqartariaqarpoq, akuersissummillu pissarsiniarluni qinnuteqartumut erseqqissarneqartariaqarpoq akuersissut pigallartuinnaasoq inaarutaasumillu aalajangiisoqarnissaata tungaannaanut atuuttoq aammalu akuersissut akuersissummik qinnuteqaammut kommunalbestyrelsip suliarinninneranut atatillugu sukkulluunniit pingaaruteqartinneqarsinnaanngitsoq.

Imm. 8-mi erseqqissarneqarpoq imigassanik aalakoornartortalinnik nioqquteqarsinnaanermut/sassaallersinnaanermut akuersissutit kommunalbestyrelsip ingerlaavartumik nakkutilliineranut atatillugu nutaamik isummerfigineqarsinnaasut suliffeqarfimmut piginnittumulluunniit tunngassuteqartut annertuumik allannguuteqarsimappata, matumanittaaq aningaasanut tunngatillugu, tassami imigassanik aalakoornartortalinnik nioqquteqarsinnaanermut/sassaallersinnaanermut akuersissummik pissarsisinnaanissamut tunngavissat pingaarnerit ilagimmassuk nioqquteqarfimmik sassaallertarfimmilluunniit isumannaatsumik ingerlatsisuusinnaanissaq. Akuersissutinik piffissami killilimmi ataavartumilluunniit arsaarinnittoqassappat tunngaviusariaqarput pissutsit annertuumik allannguuteqarnerat imaluunniit qalleqqittumik annertuunik sumiginnaanerit.

Aalajangersagaq siusinnerusukkut § 6-iusumik ingerlatitseqqinneruvoq. Inunnut imigassanik aalakoornartortalinnik nioqquteqarsinnaanermut/sassaallersinnaanermut akuersissummik pissarsinissamik kissaateqartunut piumasaqaatit maleruagassanut maannakkumut atuuttunut naapertuupput. Ingerlatseqatigiiffiit ingerlatseqatigiiffiup suunera apeqqutaatinnagu imigassanik aalakoornartortalinnik nioqquteqarsinnaanermut/sassaallersinnaanermut akuersissummik tunineqartassapput, tassa ingerlatseqatigiiffiup inuussutissarsiummik ingerlatsisinnaatitaanera inuussutissarsiorneq pillugu inatsisini aalajangersakkanik tunngaveqarmat.

Immikkut akuersissuteqarnissaq qaqutiguinnaq kissaatigineqaraangat naalakkersuisut akuersiseqqaarneqartarnissaat siunnersuutigineqarpoq. Tamatumanili tunngavissaatitaavoq suliassamik kommunalbestyrelsip suliarinnereersimanissaa inassuteqaammillu naalakkersuisunut nassiussisoqareersimanissaa.

Aningaasalersuineq pillugu aalajangersakkat immikkoortut siusinnerusukkutulli ilanngunneqarput suliassaqarfimmi unammilleqatigiinneq equngalerseqqunagu.

Inuussutissarsiummik ingerlatsinissamut inuussutissarsiorneq pillugu inatsimmi piumasaqaatit eqquutsinneqarnissaat suli piumasaqaataavoq. Eqquutsitsisoqanngippat inuussutissarsiummut allagartaq arsaarinnissutigineqassaaq tamatumalu kinguneranik imigassanik aalakoornartortalinnik nioqquteqarsinnaanermut/sassaallersinnaanermut akuersissut aamma arsaarinnissutigineqassalluni.

Imm. 5-7-ni aalajangersakkat ilanngunneqarput sassaalliisarnermik ingerlatsineq imigassanik aalakoornartortalinnik sassaallersinnaanermut akuersissummik pigisaqarfiusariaqartoq suunerata aammalu ataasiaannartumik aaqqissuussinerit suunerisa erseqinnerulersinneqarnissaat, taakku ataasiaannartumik akuersissutit pillugit § 8-mi aalajangersakkamut atatillugu isigineqassapput.

Pingaartumik imm. 13 pillugu oqaatigineqassaaq immikkoortoq nutaajuvoq ilanngunneqarlunilu pisortat suliffiutaasa niuertarfiit, akunnittarfiit, sutorniartarfiit umiarsuillu pisortanit ingerlatseqatigiiffiusut imigassanik aalakoornartortalinnik nioqquteqarnissamut/sassaallernissamut akuersissummik siusinnerusukkut pigisaqartariaqartitaannginnerisa atorunnaarsinneqarnerata kingunerisaanik. Nunaqarfinni pisiniarfiit ingerlanneqarnerannut atatillugu piumasaqaatinik sanioqqutsisinnaatitsineq pissutissaqavilluni ilanngunneqarpoq.

Aalajangersagaq inatsimmik atuuttumik allanngortitsinani ingerlatitseqqinneruvoq. Taamaattumik imigassanik aalakoornartortalinnik nioqquteqarsinnaanermut/sassaallersinnaanermut akuersissut qimataasumit kingornunneqarsinnaanngilaq. Imm. 2-mi aalajangersakkakkut qimataasoq periarfissinneqarpoq piffissami ukioq ataaseq tikillugu suliffimmik ingerlatitseqqinnissamut, taassuma kingorna pineqartoq akuersissummik nammineerluni qinnuteqartariaqarpoq.

Akiliisarnermik unitsisisoqarneratigut imaluunniit qanoq akiliisoqarnissaata isumaqatigiinniutigineqarnerani, akiliisinnaajunnaarnermik kinguneqaraluarpataluunniit, imigassanik aalakoornartortalinnik nioqquteqarsinnaanermut/sassaallersinnaanermut akuersissut atuutiinnassaaq.

Imigassanik aalakoornartortalinnik nioqquteqarsinnaanermut/sassaallersinnaanermut akuersissutip § 4-mi aalajangersakkat eqquutsinneqarunnaarnerisigut atorunnaarsinneqarnissaanik aalajangersagaq taamatulli atuuppoq pisortaatitap akuerineqarneranut atatillugu.

Sumiginnaaneq patsisigalugu imigassanik aalakoornartortalinnik nioqquteqarsinnaanermut/sas-saallersinnaanermut akuersissummik arsaarinninnissamut, matumanittaaq sumiginnaanerit ima ingasatsiginngippata ataavartumik arsaarinninnissap pisariaqannginnerani pigallartumik arsaarinninnissamut kommunalbestyrelsip piginnaatitaanera aalajangersakkakkut aalajangiusimaneqarpoq.

Aalajangersakkakkut ilaatigut siunertaavoq imigassamik atornerluinerup killiliiffigineqarnissaanut sumiiffinni ataasiakkaani oqartussaasut sakkussaqalersinneqarnissaat ilaatigullu kommunalbestyrelsip sumiiffimmilu politiit suleqatigiinnerisa pitsaanerulersinneqarnissaa.

Qaammammi ataatsimi akuersissutip arsaarinnissutigineqarnissa siulliullugu siunnersuutigineqarpoq. Tamatuma kingorna pissutsit pitsaanerulinngippata akuersissut ataavartumik arsaarinnissutigineqassaaq.

Siullermeertumik unioqqutitsisoqarsimappat imaluunniit sumiginnaanerit annikitsuinnaappata allaganngorlugu mianersoqqussummik tunniussisoqartariaqarpoq oqaatigalugu qalleqqiinerit kingunerisinnaagaat akuersissutip arsaarinnissutigineqarnera.

Taamaattumik pissutsinik nakkutilliinissamut kommunalbestyrelsi suli pisussaaffeqarpoq aammalu ingerlatsinermi sumiginnaasoqarpat akuliunnissaminut pisussaalluni. Kommunalbestyrelsi misissuiartortitsisinnaavoq, tak. § 23, naammagittaalliuutini tunngavissalinnik misissuisinnaavoq imaluunniit politiit inassuteqaataat tunngavigalugu iliuuseqarsinnaalluni.

Aalajangersagaq inatsimmik atuuttumik allanngortitsinani ingerlatitseqqinneruvoq.

Imm. 1-imi aalajangersakkakkut erseqqissarneqarpoq peqatigiiffiit katerisimaarnissaannut taamaaqataannulluunniit katersortarfinni il.il. ingerlanneqartuni isersimasut ataasiakkaat qanoq ittumilluunniit akiliuteqarfigisaannik imigassanik kimittuunik kimikitsunilluunniit sassaallerfiusuni ataasiaannartumik akuersissummik qinnuteqartoqassasoq.

Aalajangersakkakkut erseqqissarneqarpoq inuit namminneq katerisimaarnerannut ataasiaannartumik akuersissummik tunniussisoqassanngitsoq. Matumani pineqarput ilaqutariit nalliussinerat aamma inuit ikittuinnaat imminnut immikkut attuumassuteqartut matoqqasumik taamaaqataanik nalliussinerat inissarlu patsisiginerullugu inimi nalliuttorsiorfiusinnaasumi taamaaqataaniluunniit nalliuttorsiualaartut.

Imm. 2-mi erseqqissarneqarpoq ataasiaannartumik akuersissummik pissarsinissaq piumasaqaataasoq sassaallerneq klubbip peqatigiiffiulluunniit ilaasortaannaanut pigaluarpalluunniit. Aalajangersagaq sukaterissutaavoq sassaallerneq pillugu maleruagassat tamanut atuuttut sanioqqutaarniarneqarsinnaanerat pinngitsoorniarlugu.

Aalajangersagaq inatsimmik maannamut atuuttumik allanngortitsinani ingerlatitseqqinneruvoq erseqqissarlugulu init sassaallerfiit, matumanittaaq sutorniartarfiit initaat, atorneqalinnginnerminni akuerisaassasut. Minnerpaamik illuliortiternermi oqartussaasut (atuilernissamut akuersissut), qatserisartoqarnermi oqartussaasut, peqqinnissamut oqartussaasut aamma Arbejdstilsyni akuersissuteqarsimassapput.

Pisunili imikkut ittuni, inaarutaasumik akuersissut amigaatigineqarpat ajoqutillu annertuujun-ngitsut isumannaallisaanermut peqqinnissamulluunniit tunngassuteqartut pineqarpata, kommunalbestyrelsi immikkut akuersissuteqarsinnaavoq.

Maannamutut sassaallertarfinniit imigassat kimittuut annitassatut nioqqutigineqannginnissaat siunnersuutigineqarpoq, tamanna nerisassanik annissassanik pisinermut atanngippat. Aalaja-ngersakkami pineqartunut ilanngunneqarput imigassat kimikitsut.

Tamatuma peqatigisaanik sutorniartarfinni sassaallertarfinnilu isersimasut imigassanik kimittuunik kimikitsunilluunniit sassaallertarfimmiit nassatassaminnik piseqqusaajunnaarput.

Imm. 1-imi aalajangersakkami pineqarpoq imigassanik kimittuunik nalinginnaasumik nioqquteqarneq. Siunnersuutigineqarpoq taakku nioqqutigineqartassasut:

Imm. 3-mi aalajangersagaq nutaajuvoq ilanngunneqarnissaalu kissaatigineqarluni juulliaqqap ukiutoqqallu aqagunneranni ullut 23. december aamma 30. december sap. akunnerata naanerani pigaangata imigassanik kimittuunik nioqquteqarnerup eqqissisimanerusumik ingerlanneqarsinnaalernissaa siunertaralugu. Siunertarineqarpoq imigassat kimittuut imigassat kimikitsutulli juulli ukiutoqarlu sioqqullugit eqqissisimasumik pisiariniarneqarsinnaalernissaat.

Aalajangersakkami pineqarpoq imigassat kimikitsut nalinginnaasumik nioqqutigineqarnerat. Siunnersuutigineqarpoq taakku nioqqutigineqartassasut:

Imm. 1-imi imigassat kimittuut kimikitsullu nalinginnaasumik sassaalliutigineqarsinnaanissaat aalajangersarneqarpoq imatut:

Ataasinng.-sisamanng.	Tallimanng.-arfininng.	Sapaat
12.00 - 24.00	12.00 - 03.00	12.00 - 24.00

Piffissat taakku inatsimmi atuuttumi imigassat kimittuut pillugit atuuttut malippaat.

Imm. 2-mi aalajangersakkakkut mittarfiit kioskiisa akunnittarfiillu unnuiffiusut imigassanik aalakoornartortalinnik nioqquteqarsinnaanissamut/sassaallersinnaanissamullu immikkut akuersissummik kommunalbestyrelsimit tunineqarsinnaanerat periarfissinneqarpoq. "Mittarfiit kioskii" aamma "akunnittarfiit unnuiffiusut" il.il. qanoq paasineqarnissaat pillugu maleruagassanik erseqqinnerusunik Naalakkersuisut aalajangersaasinnaapput, tak. § 24, imm. 7.

Akuersissut piffissamut sivisunerpaaffissamut ataani taaneqartumut taassumaluunniit ilaannaanut tunniunneqarsinnaavoq. Piffissaq sivisunerpaaffissaq imaassaaq:

Ataasisnng.-tallimanng.	Arfininng.	Sapaat
06.00 - 12.00	06.00 - 12.00	06.00 - 12.00

Imm. 3-mi aalajangersagaq killiliinernik ullumikkut atuuttunik ingerlatitseqqippoq, tak. imigassanik kimittuunik kimikitsunillu nioqquteqarnermut sassaallertarnermullu piffissarititaq pillugu Nalunaarut.

Imm. 4-mi aalajangersagaq nalunaarummi qulaani taaneqartumi aalajangersakkamik ingerlatitseqqinneruvoq.

Imm. 5-imi aalajangersakkakkut inuit namminneq katerisimaarnerannut, soorlu ilaqutariit nalliussinerannut aamma nalliussinernut matoqqasunut allanut inini attartukkani piffissamilu sapaammiit sisamanngornermut nalinginnaasumik sassaallerfiusartoq sinnerlugu ingerlanneqartunut, ataasiartumik akuersissuteqarsinnaaneq periarfissiissutigineqarpoq. Aalajangersakkami pineqartunut ilaanngilaq nalliussineq inimi akuersissummik pigisaqartup imigassanik aalakoornartortalinnik nioqquteqarsinnaanermut/sassaallersinnaanermut akuersissutaataani pineqartunut ilaasumut, tak. imm. 6.

Imm. 6-imi aalajangersakkakkut inuit namminneq katerisimaarnerannut, soorlu ilaqutariit nalliussinerannut aamma nalliussinernut matoqqasunut allanut akuersissummik pigisaqartup sassaallertarfiutaani attartukkami ingerlanneqartunut piffissamilu sapaammiit sisamanngornermut nalinginnaasumik sassaallerfiusartoq sinnerlugu ingerlanneqartunut pisunilu ataasiakkaani ataasiaannartumik akuersissummik pissarseqqaarfiusariaqanngitsunut akuersissuteqarsinnaaneq periarfissiissutigineqarpoq.

Politiit nakkutillinerat pillugu pisuni ataasiakkaani akuersissummik pigisaqartup aaqqissuussinerup aqagunnerani sumiiffimmi politiit nalunaaruteqarfigissavai. Aaqqissuussineq aaqqissuussinerussaaq matoqqasoq aalajangersagarlu atorneqassanngilaq piffissamik sassaallerfisssamik nalinginnaasumik sanioqqutsinissaq siunertaralugu.

Imm. 5-imi 6-imilu aalajangersakkani pineqartunut ilaapput Inatsisartunut qinersinerit.

Aalajangersagaq allannguuteqanngilaq imigassanillu kimittuunik kimikitsunilluunniit angerlarsimaffimmi piliornissamut suugaluartumulluunniit inerteqqutinik aalajangersakkanik atuuttunik ingerlatitseqqissutaalluni.

Aalajangersakkakkut inini saqqummiisarfinni misiligutissanik taamaaqataannilluunniit tunniussinissaq inerteqqutigineqarpoq, matumani akiliuteqartitsisoqarpat akiliuteqartitsisoqanngikkaluarpalluunniit, ilanngunneqarporlu piffissamik sassaallerfissamik nalinginnaasumik sanioqqutsinissaq pinngitsoortinniarlugu.

Aalajangersagaq aalajangersakkanik maannakkumut atuuttunik ingerlatsitseqqissutaavoq. Aalajangersakkakkut imigassanik kimittuunik maannalu aamma imigassanik kimikitsunik inunnut 18-inik ukioqalereersimanngitsunut aalakoortunullu pisiniarfinni pisisitsinissaq inerteqqutigineqarpoq.

Imm. 4-mi aalajangersagaq pillugu, taanna malillugu akuersissummik piginnittup akisussaaffigaa inuup ilumut 18-inik ukioqalereersimaneranut uppernarsaatissat pisariaqartut pissarsiariniarnissaat, immikkut oqaatigineqassaaq matumani pineqarmat inuup kiunera apeqqutaatinnagu akisussaaffeqarneq, tak. § 27, imm. 5, taannalu inatsimmit atuuttumit allanngortinneqanngilaq.

Imm. 5-imi aalajangersagaq inatsimmik atuuttumik ingerlatseqqinneruvoq erseqqissarneqarlunilu inuit 18 inorlugit ukiullit taamaallaat inini sassaallertarfinniissinnaammata inersimasoq ingiaqatigisaq angajoqqaajuppat, angajoqqaatut sinniisuuppat imaluunniit inersimasoq allaappat pineqartumut immikkut akisussaaffilik. Taamaattumik ingiaqatigisaq inersimasoq tassaassan-ngilaq 17-inik ukiullip kammalaata 18-inik ukiulik.

Aalajangersakkanik taakkuninnga unioqqutitsineq eqqarsaatigalugu oqaatigineqassaaq akuersissummik pigisaqartoq pillaammik akilisitassanngortinneqarsinnaammat aamma unioqqutitsineq pineqartup piaaraluneerneratigoorpat mianersuaalliorneratigoorpalluunniit, tak. § 27, imm. 5.

Oqaatigineqassaaq imm. 1-imi aalajangersakkamik unioqqutitsinermut akuersissummik pigisaqartoq pillaammik akiliisitassanngortinneqarsinnaammat, aamma unioqqutitsineq pineqartup piaaraluneerneratigut mianersuaalliorneratigulluunniit pisimagaluarpalluunniit, tak. § 27, imm. 5.

Imm. 2-mi aalajangersakkakkut erseqqissarneqarpoq sassaallertarfittut ingerlatami suugaluartumiluunniit imigassat aalakoornartortaqanngitsut imeruersaatillu (sodavand) suugaluartulluunniit pisiarineqarsinnaassasut aammalu imeq sikulik isersimasunit akiliuteqarani pineqarsinnaassasoq.

Imm. 3-mi aalajangersagaq allannguuteqanngilaq isigineqassallunilu § 26, imm. 2-mut oqaaseqaatinut atatillugu.

Aalajangersakkap nassataraa eqqissiviilliortoqartillugu imaluunniit inatsisartut inatsisaanni matumani inatsisiniluunniit allani, soorlu pinerluttulerinermik inatsimmi imaluunniit politiit ileqqoreqqusaanni, aalajangersakkanik annertuumik unioqqutitsisoqarnerani politiit akuliutsinneqarnissaat imigassanillu kimittuunik kimikitsunilluunniit nioqquteqarnerup sassaallernerulluunniit ullup sinneranut matoqqusinissaat tunngavissinneqarput.

Tunngavissiissutip taamaallaat politiit periarfissippai imigassanik kimittuunik kimikitsunilluunniit nioqquteqarnerup sassaallernerulluunniit ullup unnuulluunniit sinneranut matutinneqarnissaanut. Tamatut matusineq piaartumik kommunalbestyrelsimut nalunaarutigineqassaaq, tassa kommunalbestyrelsip aalajangiiffigisassarimmagu akuersissummik pigisaqartoq annertunerusumik iliuuseqarfigineqassanersoq, matumani aamma sumiginnaaneq tunngavigalugu akuersissutip arsaarinnissutigineqarnissaata aalajangiiffigineqarnissaa, tak. § 6.

Aalajangersakkakkut siunnersuutigineqarpoq matunerup kingorna sassaallerfimmiiginnarsinnaatitaanerup maannakkut 30 minutsinik sivisussusillip 1 timimut sivitsorneqarnissaa. Naatsorsuutigineqarpoq tamatuma kingunerissagaa sassaallertarfiup eqqissisimanarnerulerlunilu toqqisisimanarnerulernissaa, oqaatigineqassaarli sassaallernerup matuneqanngitsiarnerani imigassat kimittuut kimikitsulluunniit annertuallaat sassaalliutigineqassanngitsut piffissap isersimaffiusinnaasup sinnerani eqqissisimasumik imerneqarsinnaasunit aalakoorpallaalissutaasinnaasunillu amerlanerunerunatik.

Aalajangersakkakkut erseqqissarneqarpoq nakkutilliisutut pisussaatitat inatsisartut inatsisaanni aalajangersakkat, matumanittaaq inatsit tunngavigalugu akuersissummik pigisaqartumut immikkut piumasaqaataasut, unioqqutinneqannginnerannik misissuinissamut pisinnaatitaasut.

Imm. 1-imi aalajangersagaq inatsimmik maannakkumut atuuttumik ingerlatitseqqissutaavoq aammalu imigassanik aalakoornartortalinnik nioqquteqarsinnaanermut/sassaallersinnaanermut akuersissutinik tunniussinissaq arsaarinninnissarlu pillugit immikkullu piumasaqaatit suut piumasaqaatigineqarnissaannut maleruagassanik erseqqinnerusunik aalajangersaanissamut Naalakkersuisunut periarfissiissutaalluni.

Imm. 4-mi aalajangersagaq nutaajuvoq Naalakkersuisunullu periarfissiilluni imigassanik aalakoornartortalinnik nioqquteqarsinnaanermut/sassaallersinnaanermut akuersissummik ataasiaannartumillu akuersissummik pissarsinissamut taakkunannilu allataqarnermut akiliutissap aalajangersarnissaannut.

Imm. 7-mi aalajangersagaq nutaajuvoq Naalakkersuisunullu periarfissiilluni immikkut akuersissutit, § 13, imm. 2 malillugu tunniunneqarsinnaasut, pillugit maleruagassanik erseqqinnerusunik aalajangersaanissaannut.

Aalajangersagaq, inatsimmik maannamut atuuttumik ingerlatitseqqissutaasoq, periarfissiissutaavoq init aaqqissugaanerinut atorneqarnerinullu piumasaqaatinik, matumanittaaq immikkut aaqqissugaanissaannut piumasaqaatinik, aalajangersakkanik erseqqinnerusunik naalakkersuisunit aalajangersaanissaannut.

Eqqissisimanissap torersaarnissallu piutinneqarnissaat siunertaralugu aalajangersakkanik aalajangersaasoqarsinnaavoq, matumanittaaq sulisut, soorlu matulerisut ukiukinnerpaaffissaallu, aammalu sassaallertarfimmi inuit qanoq amerlatigisut isersimatinneqarsinnaanissaannut immikkut piumasaqaatit aalajangersaaffigineqarnissaat.

Suliffiup allanut akornutaannginnissaata qularnaarneqarnissaa pillugu aalajangersakkanik, soorlu ingerlatami taassumalu qanitaani eqqiluisaarnissaq pillugu aalajangersakkanik, aalaja-ngersaasoqarsinnaavoq.

Nakkutilliisutut oqartussaatitat pillugit aalajangersakkanik aalajangersaasoqarsinnaavoq, oqaatigineqassaaq piumasaqaatit oqartussaasut allat piumasaqaataannut ataqatigiissaarneqassasut.

Aalajangersakkap siunertarai minnerpaaffissanut piumasaqaatit arlallit eqquutsinneqarnissaasa qularnaarneqarnissaat ilaatigullu imigassanik kimittuunik kimikitsunilluunniit nioqquteqarfiit sassaallerfiillu avatangiisaannut sumiiffinni oqartussaasut sunniuteqarnerulersinneqarnissaat.

Aalajangersagaq inatsimmik maannamut atuuttumik ingerlatitseqqinneruvoq aammalu nuna tamakkerlugu sumiiffinniluunniit ataasiakkaani killilersuinissat aalajangiiffigineqarnissaat eqqarsaatigalugu naalakkersuisut oqartussaatitaanerannik allannguutaanani.

Imm. 2-mi aalajangersagaq, taanna malillugu akit iluanaarutillu killissaat aalajangersaaffigineqarsinnaapput, ilanngunneqarpoq imigassanik kimittuunik kimikitsunillu nioqquteqarnikkut sassaallernikkullu aningaasarsiorsinnaanerup killilersimaarneqarnissaa siunertaralugu.

Pissutsit malillugit aalajangersagaq imigassanut kimittuunut kimikitsunulluunniit tamanut nioqqutissanulluunniit ataasiakkaanut atorneqarsinnaavoq. Aalajangersagaq nioqquteqarnermut aammalu sassaallernermut atorneqarsinnaavoq.

Siunnersuummi imm. 1-imi iluarsiissuteqartoqarpoq, taamaalilluni § 3, imm. 5 tunngavigalugu pissutissaatitaasunik kommunalbestyrelsip aalajangersarsinnaasaasa unioqqutinneqarneri pillaammik akiliisussanngortitsissutaasinnaalerput.

Imm. 2-mi aalajangersakkakkut immikkut erseqqissarneqarpoq kikkulluunniit inatsimmi aalajangersakkanik unioqqutitseqataasut pillaammik akiliisussanngortinneqarsinnaasut.

Aalajangersakkat sinneri allannguuteqartinneqanngillat. Immikkut taaneqassaaq akisussaaffik akuersissummik pigisaqartup imm. 5 malillugu unioqqutitsinernut suliffimmi sulisut piliaannut akisussaaffigisaa.

Aalajangersakkakkut erseqqissarneqarpoq naalakkersuisut suliareqqitassanngortitsiffiusussaasut. Ilanngullugu erseqqissarneqarpoq kommunalbestyrelsip aalajangiinera allaganngorlugu nalunaarutigineqartussaq pissuteqartinneqassasoq, naammagittaalliornissamut ilitsersuummik imaqassasoq naammagittaalliornissamullu piffissaliussamik paasissutissartaqassasoq.

Inatsisikkut aalajangersarneqarpoq kommunalbestyrelsip aalajangiineranut naammagittaalliuutaasinnaasoq kinguartitsinermik sunniuteqassanngitsoq.

Inatsit 1. januar 2001-imi atortuulersinneqassasoq siunnersuutigineqarpoq, tassami imigassamut inatsimmut tunngasuni nalunaarutit pioreersut pisariaqartumik allanngortinneqarnissaannut piffissaqartariaqarmat.

Imm. 2-mi aalajangersakkakkut kissaatigineqarpoq imigassamut tunngatillugu nalunaarutit peqqussutillu allat maannakkut atuuttut inatsit manna malillugu atorunnaarsinneqarnissamik nutaanilluunniit taarserneqarnissamik tungaannut atuutiinnarnissaasa qularnaarneqarnissaat kissaatigineqarpoq. Taamaattoq Imigassanik kimittuunik kimikitsunillu nioqquteqarnermut sassaallertarnermullu piffissarititaq pillugu Namminersornerullutik Oqartussat nalunaarutaat nr. 29, 27. november 1992-imeersoq erngerluni atorunnaarsinneqassaaq, tassa nalunaarummi aalajangersakkat inatsimmi matumani mannakkut ilanngunneqarmata.

Imm. 4-mi 5-imilu atortuulersitsivissat immikkoortut siunnersuutigineqartut marlunnik patsiseqarput.

Ilaatigut naatsorsuutigisariaqarpoq kioskit, videonik nioqquteqarfiit/atorniartarfiit il.il. ullumikkut inatsimmik unioqqutitsinatik imigassanik kimikitsunik nioqquteqarsinnaasut imigassanik aalakoornartortalinnik nioqquteqarsinnaanermut/sassaallersinnaanermut akuersissummik pissarsiniarlutik qinnuteqaateqartussat arlalissuussasut. Akuersissutissat pisariaqartut naammassisinnaajumallugit aammalu qinnuteqaatit tamaattut kommunalbestyrelsini piffissaalluartillugu suliarineqarsinnaaqqullugit imigassanik aalakoornartortalinnik nioqquteqarsinnaanermut/sassaallersinnaanermut akuersissummik peqarnissamik piumasaqaatip, tassungalu atatillugu init akuerineqarnissaat il.il. pillugit piumasaqaatip atortuulernissaa ulloq 1. august 2001-imi pisussatut siunnersuutigineqarpoq.

Taanna ilaatigut siunnersuutigineqarpoq pilersuisinaassutsimut atatillugu KN I Pilersuisoq A/S-ip allannguutinik naatsorsuuteqareersinnaanissaa qularnaarniarlugu. KNI Pilersuisoq A/S naliliisimavoq imigassanik kimikitsunik nioqquteqarnermi piffissaliussat pillugit maleruagassanik allannguinerup nassatarissagaa immiaaqqanik kimikitsunik nioqquteqarnerup appariangaatsiarnissaa, tamatumalu nassatarissallugu uninngasuutit ilarparujussuisa nioqqutigineqannginnerminni ullussartik qaangissagaat allannguinerlu 1. januar 2001-imi pissappat tamanna ingerlatseqatigiiffimmut annertuumik annaasaqaataassalluni.

KNI Pilersuisoq A/S nalunaarsimavoq allannguineq aatsaat qanoq iliuuseqarfigisinnaallugu 2001-2002 ukiuunerani pilersuutissatigut. Taamaattumik siunnersuutigineqarpoq § 12, imm. 1 aatsaat 1. august 2001 atortuulersinneqassasoq Qaanaamut Ittoqqortoormiinullu umiarsuit siulliit 2001-imi julip naalernerani tikinnissaat naatsorsuutigineqarmat.

	Ataasin-ngorneq	Marlun-ngorneq	Pingasun-ngorneq	Sisaman-ngorneq	Talliman-ngorneq	Arfinin-ngorneq	Sapaat
00 - 01
01 - 02
02 - 03
03 - 04
04 - 05
05 - 06
06 - 07
07 - 08
08 - 09
09 - 10	tamaasa	tamaasa	tamaasa	tamaasa	tamaasa	tamaasa
10 - 11	tamaasa	tamaasa	tamaasa	tamaasa	tamaasa	tamaasa
11 - 12	tamaasa	tamaasa	tamaasa	tamaasa	tamaasa	tamaasa
12 - 13	tamaasa	tamaasa	tamaasa	tamaasa	tamaasa	tamaasa
13 - 14	tamaasa	tamaasa	tamaasa	tamaasa	tamaasa
14 - 15	tamaasa	tamaasa	tamaasa	tamaasa	tamaasa
15 - 16	tamaasa	tamaasa	tamaasa	tamaasa	tamaasa
16 - 17	tamaasa	tamaasa	tamaasa	tamaasa	tamaasa
17 - 18	tamaasa	tamaasa	tamaasa	tamaasa	tamaasa
18 - 19
19 - 20
20 - 21
21 - 22
22 - 23
23 - 24

tamaasa = imigassanik aalakoornartulinnik kimittuunik kimikitsunillu tuniniaaneq

kimikitsut = taamaallaat imigassanik aalakoornartulinnik kimikitsunik tuniniaanissamut akuersissut

	Ataasin-ngorneq	Marlun-ngorneq	Pingasun-ngorneq	Sisaman-ngorneq	Talliman-ngorneq	Arfinin-ngorneq	Sapaat
00 - 01						tamaasa	tamaasa
01 - 02						tamaasa	tamaasa
02 - 03						tamaasa	tamaasa
03 - 04
04 - 05
05 - 06
06 - 07	immikkut	immikkut	immikkut	immikkut	immikkut	immikkut	immikkut
07 - 08	immikkut	immikkut	immikkut	immikkut	immikkut	immikkut	immikkut
08 - 09	immikkut	immikkut	immikkut	immikkut	immikkut	immikkut	immikkut
09 - 10	immikkut	immikkut	immikkut	immikkut	immikkut	immikkut	immikkut
10 - 11	immikkut	immikkut	immikkut	immikkut	immikkut	immikkut	immikkut
11 - 12	immikkut	immikkut	immikkut	immikkut	immikkut	immikkut	immikkut
12 - 13	tamaasa	tamaasa	tamaasa	tamaasa	tamaasa	tamaasa	tamaasa
13 - 14	tamaasa	tamaasa	tamaasa	tamaasa	tamaasa	tamaasa	tamaasa
14 - 15	tamaasa	tamaasa	tamaasa	tamaasa	tamaasa	tamaasa	tamaasa
15 - 16	tamaasa	tamaasa	tamaasa	tamaasa	tamaasa	tamaasa	tamaasa
16 - 17	tamaasa	tamaasa	tamaasa	tamaasa	tamaasa	tamaasa	tamaasa
17 - 18	tamaasa	tamaasa	tamaasa	tamaasa	tamaasa	tamaasa	tamaasa
18 - 19	tamaasa	tamaasa	tamaasa	tamaasa	tamaasa	tamaasa	tamaasa
19 - 20	tamaasa	tamaasa	tamaasa	tamaasa	tamaasa	tamaasa	tamaasa
20 - 21	tamaasa	tamaasa	tamaasa	tamaasa	tamaasa	tamaasa	tamaasa
21 - 22	tamaasa	tamaasa	tamaasa	tamaasa	tamaasa	tamaasa	tamaasa
22 - 23	tamaasa	tamaasa	tamaasa	tamaasa	tamaasa	tamaasa	tamaasa
23 - 24	tamaasa	tamaasa	tamaasa	tamaasa	tamaasa	tamaasa	tamaasa

tamaasa = imigassanik aalakoornartulinnik kimittuunik kimikitsunillu tuniniaaneq ajornanngilaq

immikkut = "mittarfiit kioskii"sa aammalu "akunnittarfiit unnuisussanik najugaqartullit" akuersissuteqarfiginissaat periarfissaqarpoq

Ataasinng.-tallimanng.	Arfininngorneq	Sapaat
09.00 - 18.00	09.00 - 13.00	Naagga

Ataasinng.-tallimanng.	Arfininngorneq	Sapaat
09.00 - 18.00	09.00 - 13.00	Naagga